കോന്നി മെഡിക്കല്‍ കോളജിലെ നഴ്സിംഗ് വിദ്യാര്‍ഥികളുടെ ആദ്യബാച്ച് പ്രവേശനോത്സവം ആഘോഷമായി. എം എല്‍ എ അഡ്വ. കെ യു ജനീഷ്‌കുമാറിന്റെ നേതൃത്വത്തില്‍ വിദ്യാര്‍ഥികള്‍ക്ക് പൂച്ചെണ്ട് നല്‍കി സ്വീകരിച്ചു. എം ബി ബി എസ് വിദ്യാര്‍ഥികള്‍ക്കായുള്ള എല്ലാ സൗകര്യങ്ങളും ഉപയോഗിച്ച് ഇവിടെ നഴ്സിംഗ് പഠിക്കാനെത്തിയ വിദ്യാര്‍ഥികള്‍ക്കും അധ്യയനം നടത്താന്‍ സാധിക്കുമെന്നതു വലിയ കാര്യമാണെന്ന് ഉദ്ഘാടനം നിര്‍വഹിച്ച എംഎല്‍എ പറഞ്ഞു. അതിവേഗം വളരുന്ന മെഡിക്കല്‍ കോളജാണ് കോന്നിയിലേത്. അന്യസംസ്ഥാനത്തേക്കു കേരളത്തിലെ കുട്ടികള്‍ നഴ്സിംഗ് പഠനത്തിനായി പോകുന്നതിനുള്ള പരിഹാരമായാണ് സംസ്ഥാനസര്‍ക്കാര്‍ കേരളത്തില്‍ അതിനുള്ള അവസരമൊരുക്കിയത്.

മുഖ്യമന്ത്രി പിണറായി വിജയന്റേയും ആരോഗ്യമന്ത്രി വീണാജോര്‍ജിന്റേയും ഉന്നതവിദ്യാഭ്യാസവകുപ്പ് മന്ത്രി ആര്‍. ബിന്ദുവിന്റേയും  നേതൃത്വത്തില്‍ മികച്ച പ്രവര്‍ത്തനങ്ങളാണ് നടത്തുന്നത്. 20 നഴ്സിംഗ് കോളേജ് സര്‍ക്കാര്‍ പുതുതായി അനുവദിച്ചതില്‍ രണ്ടെണ്ണം കോന്നിയിലാണ്. കോളജിന്റെ പുതിയ കെട്ടിടത്തിനായി മൂന്നേക്കര്‍ സ്ഥലം അനുവദിച്ചിട്ടുണ്ടെന്നും എംഎല്‍എ പറഞ്ഞു.
60 വിദ്യാര്‍ഥികളാണ് ആദ്യവര്‍ഷക്ലാസുകളിലേക്ക് എത്തിയത്. ഇതില്‍ പതിനാല് പേര്‍ ആണ്‍കുട്ടികളാണ്. കോന്നി മെഡിക്കല്‍ കോളജിന്റെ അക്കാദമിക് ബ്ലോക്കില്‍ രണ്ടാമത്തെ ഫ്‌ളോറാണ് നഴ്‌സിംഗ് കോളജിനായി ഉപയോഗിക്കുന്നത്. ആദ്യഘട്ടത്തില്‍ ഒരു ക്ലാസ് റൂം, ലാബ്, ഫാക്കല്‍ട്ടി റൂം, പ്രിന്‍സിപ്പല്‍ റൂം, ടോയ്‌ലെറ്റുകള്‍ എന്നിവയാണ് ക്രമീകരിച്ചിട്ടുള്ളത്. ലൈബ്രറി, എക്‌സാമിനേഷന്‍ ഹാള്‍ എന്നിവ മെഡിക്കല്‍ കോളജിന്റെ വിദ്യാര്‍ഥികള്‍ക്കൊപ്പം ഉപയോഗിക്കും.
നഴ്‌സിംഗ് കോളജിലേക്ക് ആവശ്യമായ ഫര്‍ണിച്ചറുകളും എത്തിച്ചിട്ടുണ്ട്. രണ്ട് ഫാക്കല്‍റ്റികളാണ് ഇപ്പോള്‍ നഴ്സിംഗ് കോളേജിലുള്ളത്. കേരളത്തിലെ പതിനാല് ജില്ലകളില്‍ നിന്നുമുള്ള വിദ്യാര്‍ഥികളും എത്തിയിട്ടുണ്ട്. പത്തനംതിട്ടയിലെ പതിനാറ് വിദ്യാര്‍ഥികളാണ് ആദ്യബാച്ചില്‍ അഡ്മിഷന്‍ നേടിയിരിക്കുന്നത്.
അരുവാപ്പുലം ഗ്രാമപഞ്ചായത്ത് പ്രസിഡന്റ് രേഷ്മ മറിയം റോയ് അധ്യക്ഷത വഹിച്ച ചടങ്ങില്‍ തിരുവനന്തപുരം മെഡിക്കല്‍ കോളജ് സീനിയര്‍ സൂപ്രണ്ട് സതീശന്‍, നഴ്സിംഗ് കോളേജ് പ്രിന്‍സിപ്പല്‍ കെ.ആര്‍ അനുപ, മെഡിക്കല്‍ കോളജ് നഴ്സിംഗ് സൂപ്രണ്ട് എന്‍ സി സിന്ധു തുടങ്ങിയവര്‍ പങ്കെടുത്തു.

റിപ്പോര്‍ട്ടര്‍ : സുരാജ് പുനലൂര്‍

പുനലൂർ : എസ് എൻ ട്രസ്റ്റ് റീജിയൻ തെരഞ്ഞെടുപ്പിൽ വെള്ളാപ്പള്ളി നടേശൻ നയിക്കുന്ന പാനിലും ഗോകുലം ഗോപാലൻ നയിക്കുന്ന പാനലും തമ്മിൽ വാശിയേറിയ തെരഞ്ഞെടുപ്പ് ശനിയാഴ്ച നടന്നു. കൊല്ലം, പുനലൂർ എന്നിവിടങ്ങളില്‍ ആണ് പ്രധാനമായി തെരഞ്ഞെടുപ്പ് നടന്നത്.

പുനലൂരിൽ നടന്ന തിരഞ്ഞെടുപ്പിൽ പത്തനംതിട്ട മുതൽ കൊട്ടാരക്കര എഴുകോൺ അഞ്ചൽ പുനലൂർ താലൂക്ക് കമ്മിറ്റികൾ തെരഞ്ഞെടുപ്പിൽ പങ്കെടുത്തു. കോടതി നിർദ്ദേശപ്രകാരം കർശനമായ നിയന്ത്രണങ്ങൾ പാലിച്ചായിരുന്നു തെരഞ്ഞെടുപ്പ് നടത്തിയത്. ഒരു സ്ഥലത്തും ഒരു പ്രകോപനവും ഉണ്ടായതായി റിപ്പോർട്ട് ചെയ്യപ്പെട്ടിട്ടില്ല. പുനലൂരിൽ നടന്ന തെരഞ്ഞെടുപ്പിൽ എസ് എൻ കോളേജ് ആയിരുന്നു വോട്ടെടുപ്പ് കേന്ദ്രം. വിവിധ മേഖലകളിലുള്ള ഉദ്യോഗസ്ഥർ എസ്എൻ കോളേജിലെ അധ്യാപകർ അനധ്യാപകർ എന്നിവരായിരുന്നു തെരഞ്ഞെടുപ്പ് ഉദ്യോഗസ്ഥരായി ഉണ്ടായിരുന്നത്.  മൊത്തം 63 അംഗങ്ങളെയാണ് തിരഞ്ഞെടുക്കേണ്ടത്. പുനലൂർ താലൂക്ക് യൂണിയന്റെ നേതൃത്വത്തില്‍ വളരെ ചിട്ടയായി താലൂക്ക് പ്രസിഡന്റ് ശ്രീ സുന്ദരേശൻ നിര്‍ദ്ദേശത്തോടെ  പ്രധാന പ്രവർത്തകർ എല്ലാം തന്നെ തെരഞ്ഞെടുപ്പ് പ്രവര്‍ത്തങ്ങള്‍ എകൊപ്പിച്ച്ചു. തിരഞ്ഞെടുപ്പ് കാണുന്നതിനായി വോട്ട് ഉള്ളവർക്കൊപ്പം വോട്ട് ഇല്ലാത്തവരായ ആയിരക്കണക്കിന് ആളുകൾ തിങ്ങി നിറഞ്ഞിരുന്നു. പോളിംഗ് സ്റെഷനില്‍ വന്നിരുന്ന മുഴുവൻ ആളുകൾക്കും പുനലൂർ താലൂക്ക് കമ്മിറ്റി സ്വാഗതമേകി.  അവർക്ക് എല്ലാം തന്നെ ആവശ്യമായ വാഹന സൗകര്യം കോളേജിൽ നിന്നും റോഡിൽ എത്തുന്നതിനും കൂടാതെ മുഴുവനാളുകൾക്കും ഉച്ചയ്ക്ക് ഭക്ഷണവും ക്രമീകരിച്ചിരുന്നു. അഞ്ചുമണി വരെയായിരുന്നു വോട്ടിംഗ്.

പുനലൂർ : മലയോര ഹൈവേയിലൂടെ ദീർഘദൂര ബസ് സർവീസുകളുടെ ആവശ്യകത ഉയർന്നു വരുന്നുണ്ട്. മലയോര ഹൈവേ പണി പൂർത്തിയായതോടെ തിരുവനന്തപുരം അങ്കമാലി റൂട്ടിൽ എംസി റോഡിന് സമാന്തരമായി തിരക്ക് കുറഞ്ഞ് സഞ്ചരിക്കാൻ കഴിയുന്നുണ്ട്. എന്നാൽ ലോ ഫ്ലോർ,എ.സി ബസുകൾ ഒന്നുപോലും റൂട്ടിലൂടെ സർവീസ് നടത്തുന്നില്ല.ബാംഗ്ലൂർ, മംഗളൂർ, പഴനി, മൂകാംബിക, വേളാങ്കണ്ണി തുടങ്ങിയ ദീർഘദൂര സർവീസുകളും, AC, ലോ ഫ്ളോർ, ജനത,MULTI ആക്സിൽ, SWIFT, സെമി സ്ലീപ്പർ ബസ് സർവീസുകളും തിരുവനന്തപുരം – പുനലൂർ – അങ്കമാലി ഉൾപ്പെടുന്ന മലയോര ഹൈവേ വഴി അനുവദിക്കുന്നതിനുള്ള നടപടി സ്വീകരിക്കണമെന്ന് ആവശ്യപ്പെട്ട് സിപിഐഎം ജില്ലാ സെക്രട്ടറിയേറ്റ് അംഗം സ.എസ് ജയമോഹന്‍, DYFI പുനലൂര്‍ ബ്ലോക്ക് സെക്രട്ടറി അഡ്വ. ശ്യാം,  ബ്ലോക്ക് പ്രസിഡന്റ് ശ്യാഗിൻ കുമാർ എന്നിവർ ഗതാഗത മന്ത്രി ശ്രീ ആന്റണി രാജുവിനെ നേരിൽകണ്ട് നിവേദനം സമർപ്പിച്ചു.നിവേദനം അനുഭാവപൂർവ്വം പരിഗണിക്കാമെന്ന് മന്ത്രി ഉറപ്പ് നൽകി.